కలవారి కోడలు

(1948 జనవరి చందమామ నుంచి)

కలవారి కోడలు కలికి కామాక్షి
కడుగుచున్నది పప్పు కడవలో పోసి
అప్పుడే ఏతెంచె ఆమె పెద్దన్న
కాళ్ళకు నీళ్ళిచ్చి కన్నీరు నింపె

"ఎందుకో కన్నీరు ఏమి కష్టమ్ము?
తుడుచుకో చెల్లెలా, ముడుచుకో కురులు,
ఎత్తుకో బిడ్డను, ఎక్కు అందలము,
మీ అత్తమామలకు చెప్పిరావమ్మ."

"కుర్చీపీట మీద కూర్చున్న అత్త,
మా అన్నలొచ్చారు మము బంపుతార?"
"నేనెరుగ నేనెరుగ, మీమామ నడుగు!"

"పట్టెమంచము మీద పడుకున్న మామ,
మా అన్నలొచ్చారు మము బంపుతార?"
"నేనెరుగ నేనెరుగ, మీబావనడుగు!"

"భారతము చదివేటి బావ, పెదబావ,
మా అన్నలొచ్చారు మము బంపుతార?"
"నేనెరుగ నేనెరుగ, మీఅక్కనడుగు!"

"వంట చేసే తల్లి ఓ అక్కగారూ,
మా అన్నలొచ్చారు మము బంపుతార?"
"నేనెరుగ నేనెరుగ, నీభర్తడుగు!"

"రచ్చలో వెలిగేటి రాజేంద్రభోగి,
మా అన్నలొచ్చారు మము బంపుతార?"
"పెట్టుకో సొమ్ములూ, కట్టుకో చీర,
పోయిరా సుఖముగా పుట్టింటికిని.